生日睇企鵝 成世笑呵呵

由細到大，生日不嬲都係過左就算，又或者過唔倒都算。
今年係邊度過都真係唔地除，大概係南美以南，西沙以西。

由東半球飛去西半球，又由北半球走落南半球，半球加半球，真係無雷公兼無陰公咁叉死遠。前幾日卒之黎到聖地牙哥（嚴正聲明：唔係香港時鐘酒店，係智利首都），過兩日就一路向南殺落Puerto Montt，好啦，就係度過生日啦，離呢度一百公里左右遠既Pumillahue，附近有一個地方出名人少企鵝多，岩晒我！
這邊差唔多係智利高速公路既盡頭，再繼續向南行開始有難度，呢次旅行剩低既時間買少見少，所以下一站Puerto Natales搭飛機，不過飛機唔係日日有，所以要響度留三days咁大把，順便攤抖過生日。
係Puerto Montt既巴士站就有local團可以join，價錢仲幾老少咸宜添，我好豪咁一口氣訂左三個團，一個一皮兩個兩皮半（其實加埋之不過係八十美金，不過唔包入場，但計起黎車馬費都唔止啦），旅行社可能因為我生日，仲特別收平我四千披索咁話。
第一日去湖區，都唔錯，不過個司機兼導遊返黎竟然講話，聽日企鵝團要delay，有冇搞錯呀，人地生日要睇企鵝架嘛，真係delay no more，返去問老闆點搞，佢話因為唔夠人頭（根本冇人？）報團，所以幾時成行無可奉告，唉，我落搭就係貪佢呢間野話有企鵝團之嘛，點知而家真係企左響度。

好著呢個世界仲有一樣野叫自由行，冇人陪我過生日唔緊要，有企鵝咪得攞。
要睇企鵝話近唔近，話遠唔遠，但係交通唔算好方便，佢地響一個叫做Chiloe既大島上，個大島有成十個香港咁大，佢勉強都算同香港有少少拿更架，佢係南美最後一個脫離西班牙統治既地方，而且響西班牙臨尾香個陣，仲諗住將呢個島送比英國，不過老奸巨英國佬唔刮佢，結果呢個島響1826年大解放。
去睇企鵝都好遠水路架，我先先要去Ancud，響Puerto Montt坐巴士去要熬兩三粒鐘，去到之後買埋巴士回程飛，再坐車去Pumillahue，本來諗住豪d坐的士，點知個的士大佬竟然求其響市中心有落，之後問左四五個人，包括警察先生，但都係老點居多，最後(乙水)(乙水)轉先去到巴士站，之後既路就麻麻地，雖然唔駛三十公里，但都好似坐著成粒鐘，最後坐到訓著左，好在賣飛哥哥（車上邊除左司機大佬既另外一個staff）叫醒我，之後仲好好彩有個響penguin colony做野既大佬兜埋我，唔係荒山野嶺都幾叫天不應叫地不聞，要行既話睇怕最少都要大半粒鐘。
黎到呢度都差唔多食lunch，不過都係睇左企鵝先啦，但因為剩係得我一丁友，所以要等多幾個人先至可以坐快艇出海。係等運到期間，有個staff問香港究竟係城市定係國家，我話梗係城市啦，佢聽到之後鬼咁歡喜，原來佢老兄同人打賭；後來果位輸家唔忿氣又走埋黎問我，本BNO passport係咪香港出，我又話係，佢聽到之後又鬼死咁歡喜……我諗對南美人黎講，香港光榮既歷史兼偉大既一國兩制實在複雜過九記牛雜，尤其係佢地好多人仲以為香港人就係Japanese或者Taiwanese！
講得兩講，就有一男一女加入，每人放低十零美金，湊埋三個人就可以出海，呢度有兩款企鵝，頸上有兩個黑色圓圈既叫Magellanic，呢款企鵝響阿根廷南至福克蘭群島都有好多；另外頸上得一個圈既叫Humboldt，呢款企鵝北到係秘魯都有架，其實企鵝並唔係話剩係南極至有，相反係赤道附近既Galapagos都有，當然品種就唔同，好似人咁，都有愛斯基摩人都非州黑人（僧）啦，仲有廣東省順德人添。除左企鵝，是日仲臨場加演海獅海鳥海草……不過因為冇得上岸，所以只能遠觀不得褻玩。
睇完企鵝表演，本來已經諗住打道回府，不過原來個對男女係新婚夫妻，佢地包左架的士，於是咪順便載埋我囉，佢地仲話接住會去Castro可以一齊，我話你地honey moon喎，阻住你地happy就唔好啦，點知個老公話，而家又唔係夜晚黑，阻乜姐，咁又係，日光日白都冇話電唔電燈膽啦。
因為冇食晏晝，所以個肚餓到咕咕聲，好彩對新婚夫妻即時整左件三文治我頂肚，如果唔係都唔知點捱落去，因為響Ancud開去Castro架巴士竟然遲大到，但有失亦有得，張回程飛可以退返錢。
Castro最出名既就係起係湖邊既七彩弔腳樓（即係當地人講既Palafitos），不過未睇之前，我地先去左參觀意大利佬Eduardo Provosoli響1906起好既大教堂，裡面全部都係木造架，據聞係因為以前呢個島五行欠金（唔出金屬），於是咪就地取材用木造囉，聽講連釘都冇乜咁話，不過睇落去就唔似入榫，唔知係咪痴膠水，抑或痴膠花？
跟住我地包左架的士走左一轉，司機盛意拳拳禮貌周周，簡直係今時今日服務業既典範，佢車牌號碼係BK-RS-99，下次得閒記得mark佢，撻我朵八五折。天氣雖然麻麻，但係墳場上面同埋響發射站望落去，都算心懭神怡新婚愉快，今時今日好男人唔易搵，老公史提芬好熱心咁一路同我翻譯司機講既野，上至天文，下至地埋，一字不漏，鉅細無遺，都真係抵得諗兼唔話得，抵佢娶個靚老婆！
好快就七點幾，食晚餐個陣我「表明身份」，新婚阿嫂當堂攬住我整個birthday kiss我嘆，唉呀！朋友妻，咪走雞，呀！唔係，咪亂黎至岩，難為佢地仲要約我聽晚再出黎齊齊撐枱腳咁話。

如是者牛一就咁過左，由Chiloe北部去返智利大陸要搭汽車渡海小輪，都真係好懷舊，記得十幾歲初初出黎做野個陣，香港都仲有呢家野，不過好快就摺埋左，完成歷史任務，成為歷史陳蹟，諗返起，都真係誤墮塵網中，一去十九幾年。


p.s.
由於太開心，樂極生悲舔左野，第日用ATM欽錢唔記得攞返張提款卡，亦既係信用卡….（其實因為呢邊有D提款機係先攞錢錢後攞卡….（係香港我剩係試過唔記得攞錢，唔知咁算唔算有進步）

7/12/2011補記於南極MS-Expedition船艙內